*ಹಾವು ಕಡಿತದ ಘೋರ ವಿಷ ತಟಸ್ಥಗೊಳಿಸುವ ಸಂಶ್ಲೇಷಿತ ಪ್ರತಿಕಾಯ*

*22 ಫೆಬ್ರವರಿ, 2024*

ಚಿತ್ರ ಶೀರ್ಷಿಕೆ ಮತ್ತು ಕೃಪೆ: ಐಐಎಸ್‌ಸಿ ಕ್ಯಾಂಪಸ್‌ನಲ್ಲಿ ಕಂಡುಬಂದ ಭಾರತೀಯ ನಾಗರಹಾವು (ಎಲಾಪಿಡಿ ಕುಟುಂಬಕ್ಕೆ ಸೇರಿದ ಇಂಡಿಯನ್ ಸ್ಪೆಕ್ಟಕಲ್ಡ್ ಹಾವು) (ಚಿತ್ರ: ಕಾರ್ತಿಕ್ ಸುಣಗಾರ್)

ಸ್ಕ್ರಿಪ್ಸ್ ರೀಸರ್ಚ್ ಇನ್‌ಸ್ಟಿಟ್ಯೂಟ್ ಮತ್ತು ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್‌ಸಿ)ಯ ಪರಿಸರ ವಿಜ್ಞಾನಗಳ ಕೇಂದ್ರದ (ಸಿಇಎಸ್), ಎವಲ್ಯೂಷನರಿ ವೆನೊಮಿಕ್ಸ್ ಲ್ಯಾಬ್ (EVL)ನ ವಿಜ್ಞಾನಿಗಳು ಎಲಾಪಿಡಿ ಕುಟುಂಬಕ್ಕೆ ಸೇರಿದ ತೀವ್ರ ವಿಷಕಾರಿ ಹಾವುಗಳ ಪ್ರಬಲ ನ್ಯೂರೋಟಾಕ್ಸಿನ್ ಅನ್ನು ತಟಸ್ಥಗೊಳಿಸಬಲ್ಲ ಸಂಶ್ಲೇಷಿತ ಮಾನವ ಪ್ರತಿಕಾಯವನ್ನು ಅಭಿವೃದ್ಧಿಪಡಿಸಿದ್ದಾರೆ. ನಾಗರಹಾವು, ಕಾಳಿಂಗ ಸರ್ಪ ನಾಗರಹಾವು, ಕಟ್ಟುಹಾವು (ಕ್ರೈಟ್) ಮತ್ತು ಕಪ್ಪು ಮಾಂಬಾ ಈ ಕುಟುಂಬಕ್ಕೆ ಒಳಪಡುವ ಹಾವುಗಳಲ್ಲಿ ಸೇರಿವೆ.

ವಿಷವನ್ನು ತಟಸ್ಥಗೊಳಿಸುವ ಹೊಸ ಪ್ರತಿಕಾಯವನ್ನು ಸಂಶ್ಲೇಷಿಸಲು ತಂಡವು ಎಚ್ಐವಿ ಮತ್ತು ಕೋವಿಡ್-19 ವಿರುದ್ಧದ ಪ್ರತಿಕಾಯಗಳನ್ನು ಪರೀಕ್ಷಿಸಲು (ಸ್ಕ್ರೀನಿಂಗ್ ಮಾಡಲು) ಮೊದಲು ಬಳಸಲಾಗಿದ್ದ ವಿಧಾನವನ್ನು ಅಳವಡಿಸಿಕೊಂಡಿದೆ.
“ಇದೇ ಮೊದಲ ಸಲ ಹಾವು ಕಡಿತದ ಚಿಕಿತ್ಸೆಗೆ ಪ್ರತಿಕಾಯಗಳನ್ನು ಅಭಿವೃದ್ಧಿಪಡಿಸಲು ಈ ನಿರ್ದಿಷ್ಟ ತಂತ್ರವನ್ನು ಅನ್ವಯಿಸಲಾಗಿದೆ” ಎನ್ನುತ್ತಾರೆ ಸಿ.ವಿ.ಎಸ್‌.ನ ಇ.ವಿ.ಎಲ್‌.ನಲ್ಲಿ ಪಿಎಚ್.ಡಿ. ವಿದ್ಯಾರ್ಥಿ ಹಾಗೂ ಸೈನ್ಸ್ ಟ್ರಾನ್ಸ್ಲೇಷನಲ್ ಮೆಡಿಸಿನ್‌ನಲ್ಲಿ ಪ್ರಕಟವಾಗಿರುವ ಅಧ್ಯಯನದ ಮೊದಲ ಸಹ-ಲೇಖಕರಾದ ಸೆಂಜಿ ಲ್ಯಾಕ್ಷ್ಮೆ ಆರ್ ಆರ್.

ಈ ಬೆಳವಣಿಗೆಯು ಹಲವು ಬಗೆಯ ಹಾವಿನ ವಿಷಗಳ ವಿರುದ್ಧ ವಿಶಾಲ ವ್ಯಾಪ್ತಿಯ ರಕ್ಷಣೆ ಒದಗಿಸಬಲ್ಲ “ಸಾರ್ವತ್ರಿಕ ಪ್ರತಿಕಾಯ ಪರಿಹಾರ’ದೆಡೆಗೆ ನಮ್ಮನ್ನು ಒಂದು ಹೆಜ್ಜೆ ಹತ್ತಿರ ಕೊಂಡೊಯ್ದಿದೆ ಎಂದು ಸಂಶೋಧಕರು ಅಭಿಪ್ರಾಯಪಟ್ಟಿದ್ದಾರೆ.

ಹಾವು ಕಡಿತ ಪ್ರಕರಣಗಳು, ಮುಖ್ಯವಾಗಿ ಭಾರತ ಮತ್ತು ಆಫ್ರಿಕಾದ ಸಹರಾದ ದಕ್ಷಿಣಕ್ಕಿರುವ ದೇಶಗಳಲ್ಲಿ (ಸಬ್-ಸಹರಾ) ಪ್ರತಿವರ್ಷವೂ ಸಾವಿರಾರು ಸಾವುಗಳಿಗೆ ಕಾರಣವಾಗುತ್ತವೆ. ಪ್ರಸ್ತುತ ಅನುಸರಿಸುತ್ತಿರುವ ವಿಧಾನದಲ್ಲಿ ಪ್ರತಿವಿಷಗಳನ್ನು (ಆಂಟಿವೆನಮ್‌ಗಳನ್ನು) ಅಭಿವೃದ್ಧಿಪಡಿಸಲು ಕುದುರೆ, ಕುದುರೆಮರಿ ಮತ್ತು ಹೇಸರಗತ್ತೆಯಂತಹ (ಈಕ್ವೈನ್ ಗಳು) ಪ್ರಾಣಿಗಳ ದೇಹಕ್ಕೆ ಹಾವಿನವಿಷ ಸೇರಿಸಿ, ನಂತರ ಅವುಗಳ ರಕ್ತದಿಂದ ಪ್ರತಿಕಾಯಗಳನ್ನು ಸಂಗ್ರಹಿಸಲಾಗುತ್ತದೆ. ಆದರೆ ಈ ವಿಧಾನದಲ್ಲಿ ಹಲವಾರು ತೊಡಕುಗಳಿವೆ.

“ಈ ಪ್ರಾಣಿಗಳು ತಮ್ಮ ಜೀವಿತಾವಧಿಯಲ್ಲಿ ವಿವಿಧ ಬ್ಯಾಕ್ಟೀರಿಯಾಗಳು ಮತ್ತು ವೈರಸ್‌ಗಳಿಗೆ ತಮ್ಮನ್ನು ಒಡ್ಡಿಕೊಂಡಿರುತ್ತವೆ” ಎಂದು ಸಿ.ಇ.ಎಸ್.ನಲ್ಲಿ ಸಹ-ಪ್ರಾಧ್ಯಾಪಕರಾಗಿರುವ ಅಧ್ಯಯನದ ಜಂಟಿ ಸಹಲೇಖಕರಾದ ಕಾರ್ತಿಕ್ ಸುಣಗಾರ್ ವಿವರಿಸುತ್ತಾರೆ. “ಇದರ ಪರಿಣಾಮವಾಗಿ, ಪ್ರತಿವಿಷಗಳು (ಆಂಟಿವೆನಮ್‌ಗಳು) ಚಿಕಿತ್ಸೆಯ ದೃಷ್ಟಿಯಿಂದ ಅನವಶ್ಮಕವಾದ ಸೂಕ್ಷ್ಮಾಣುಜೀವಿಗಳ ವಿರುದ್ಧದ ಪ್ರತಿಕಾಯಗಳನ್ನು ಕೂಡ ಒಳಗೊಂಡಿರುತ್ತವೆ. ವಾಸ್ತವವಾಗಿ, ಆಂಟಿವೆನಮ್‌ನ ಬಾಟಲಿಯ ಶೇಕಡ 10ಕ್ಕಿಂತ ಕಡಿಮೆ ಪ್ರಮಾಣವಷ್ಟೇ
ಹಾವಿನ ವಿಷಗಳಿಗೆ ಸಂಬಂಧಿಸಿದ ಪ್ರತಿಕಾಯಗಳನ್ನು ಹೊಂದಿರುತ್ತದೆ ಎಂಬುದು ಸಂಶೋಧನೆಯಿಂದ ದೃಢಪಟ್ಟಿದೆ.

ತಂಡವು ಅಭಿವೃದ್ಧಿಪಡಿಸಿರುವ ಈ ಪ್ರತಿಕಾಯವು ಎಲಾಪಿಡಿ ವಿಷನಲ್ಲಿನ ಥ್ರೀ-ಫಿಂಗರ್ ಟಾಕ್ಸಿನ್ (3FTx) ಎಂಬ ಪ್ರಮುಖ ನಂಜಿನ ಪ್ರಧಾನ ಘಟಕದ ಸಂರಕ್ಷಿತ ನೆಲೆಯನ್ನು ಗುರಿಯಾಗಿಸಿಕೊಂಡು ಕಾರ್ಯಾಚರಿಸುತ್ತದೆ. ಎಲಾಪಿಡಿಗಳ ಬೇರೆ ಬೇರೆ ಪ್ರಭೇದಗಳು ವಿಭಿನ್ನ 3FTxಗಳನ್ನು ಸೃಜಿಸುತ್ತವೆಯಾದರೂ ಪ್ರೊಟೀನ್‌ನಲ್ಲಿರುವ ಕೆಲವಷ್ಟು ನೆಲೆಗಳು ಒಂದೇ ತರಹ ಇರುತ್ತವೆ. ತಂಡದ ಸಂಶೋಧಕರು ಅಂತಹ ಒಂದು ಸಂರಕ್ಷಿತ ನೆಲೆ- ಡೈಸಲ್ಫೈಡ್ ಕೋರ್-ಅನ್ನು ಪತ್ತೆ ಹಚ್ಚಿದರು. ಮಾನವ ಜನ್ಯ ಕೃತಕ ಪ್ರತಿಕಾಯಗಳ ದೊಡ್ಡ ಸಂಗ್ರಹವನ್ನು ಯೀಸ್ಟ್ ಜೀವಕೋಶದ ಮೇಲ್ಮೈ ಮೇಲೆ ವಿನ್ಯಾಸಗೊಳಿಸಿ ಪ್ರದರ್ಶಿಸಿದರು, ನಂತರ ಅವರು ಪ್ರಪಂಚದ ವಿವಿಧೆಡೆಗಳ ಎಲಾಪಿಡಿ ಹಾವುಗಳ 3FTx ಗಳಿಗೆ ಪ್ರತಿಕಾಯಗಳು ಅಂಟಿಗೊಳ್ಳಬಲ್ಲ ಸಾಮರ್ಥ್ಯವನ್ನು ಪರೀಕ್ಷಿಸಿದರು. ಹಲವು ಸಲ ಸ್ಕ್ರೀನಿಂಗ್ (ಪರೀಕ್ಷೆ) ಪುನರಾವರ್ತಿಸಿದ ಅವರು ವಿವಿಧ 3FTxಗಳಿಗೆ ಬಲವಾಗಿ ಆಂಟಿಕೊಳ್ಳಬಲ್ಲ ಒಂದು ಪ್ರತಿಕಾಯಕ್ಕೆ ತಮ್ಮ ಆಯ್ಕೆಯನ್ನು ಸೀಮಿತಗೊಳಿಸಿದರು. ಸಾರ್ವಜನಿಕ ಭಂಡಾರದಲ್ಲಿರುವ 149 ಬಗೆಯ 3FTx ಗಳಲ್ಲಿ ಈ ಪ್ರತಿಕಾಯವು 99 ಬಗೆಯ 3FTx ಗಳಿಗೆ ಅಂಟಿಕೊಳ್ಳುವ ಸಾಮರ್ಥ್ಯ ಹೊಂದಿರುತ್ತದೆ.

ಮುಂದುವರಿದು, ತಜ್ಞರು ತಾವು ಅಭಿವೃದ್ಧಿಪಡಿಸಿದ ಪ್ರತಿಕಾಯವನ್ನು ಪ್ರಾಣಿ ಮಾದರಿಗಳ ಮೇಲೆ ಪರೀಕ್ಷಿಸಿದರು. ಒಂದು ಗುಂಪಿನ ಪ್ರಯೋಗಗಳಲ್ಲಿ, ಸಂಶ್ಲೇಷಿತ ಪ್ರತಿಕಾಯವನ್ನು ಅವರು ತೈವಾನಿನ ಪಟ್ಟೆ ಕಟ್ಟುಹಾವು (ತೈವಾನಿನ ಬ್ಯಾಂಡೆಡ್ ಕ್ರೈಟ್‌ನಿಂದ) ಸೃಜಿಸುವ ವಿಷಕಾರಿ 3FTx ದೊಂದಿಗೆ ಮೊದಲೇ ಮಿಶ್ರಣ ಮಾಡಿ, ಅದನ್ನು ಇಲಿಗಳ ಶರೀರಕ್ಕೆ ಸೇರಿಸಿದರು. ಕೇವಲ ವಿಷವನ್ನು ಸೇರಿಸಲಾಗಿದ್ದ ಇಲಿಗಳು ನಾಲ್ಕು ಗಂಟೆಗಳ ಅವಧಿಯೊಳಗೆ ಸತ್ತುಹೋದವು. ಆದರೆ “ವಿಷ-ಪ್ರತಿಕಾಯ” ಮಿಶ್ರಣವನ್ನು ಸೇರಿಸಲಾಗಿದ್ದ ಇಲಿಗಳು 24 ಗಂಟೆಗಳ ಪರಿವೀಕ್ಷಣಾ ಅವಧಿಯ ನಂತರವೂ ಬದುಕುಳಿದವಲ್ಲದೆ ಪೂರ್ತಿ ಆರೋಗ್ಯಕರವಾಗಿಯೂ ಇದ್ದವು.

ಪೂರ್ವ ಭಾರತದ ಮಾನೊಕಲ್ಡ್ ನಾಗರಹಾವಿನ ಮತ್ತು ಆಫ್ರಿಕಾದಲ್ಲಿ ಸಹರಾದ ದಕ್ಷಿಣಕ್ಕಿರುವ ದೇಶಗಳಲ್ಲಿನ ಕಪ್ಪು ಮಾಂಬಾದ ವಿಷದ ವಿರುದ್ಧ ಕೂಡ ಈ ಪ್ರತಿಕಾಯವನ್ನು ತಜ್ಞರ ತಂಡ ಪರೀಕ್ಷಿಸಿ, ಇದೇ ರೀತಿಯ ಫಲಿತಾಂಶಗಳನ್ನು ಕಂಡುಕೊಂಡಿತು. ಪ್ರತಿಕಾಯದ ಪರಿಣಾಮಕಾರಿತ್ವವು ಸಾಂಪ್ರದಾಯಿಕ ಉತ್ಪನ್ನಕ್ಕಿಂತ ಸುಮಾರು 15 ಪಟ್ಟು ಹೆಚ್ಚು ಎಂಬುದು ದೃಢಪಟ್ಟಿರುತ್ತದೆ. ಮುಖ್ಯವಾಗಿ, ಮೊದಲು ವಿಷವನ್ನು ಸೇರಿಸಿ, ಆಮೇಲೆ, 0 ನಿಮಿಷ, 10 ನಿಮಿಷ ಮತ್ತು 20 ನಿಮಿಷ ಬಿಟ್ಟು ಪ್ರತಿಕಾಯವನ್ನು ಸೇರಿಸಿದಾಗಲೂ ಇಲಿಗಳ ಪ್ರಾಣ ಉಳಿಸುವುದಕ್ಕೆ ಸಾಧ್ಯವಾಯಿತು. ಇದಕ್ಕೆ ಬದಲಾಗಿ, ಸಾಂಪ್ರದಾಯಿಕ ಉತ್ಪನ್ನವನ್ನು ವಿಷ ಕೊಟ್ಟ ಸಮಯದಲ್ಲೇ ಕೊಟ್ಟಾಗ ಮಾತ್ರ ಉತ್ತಮವಾಗಿ ಕಾರ್ಯನಿರ್ವಹಿಸುವುದು ಕಂಡು ಬಂತು. ಇದನ್ನು ಕೊಡುವುದು ಕೇವಲ 10 ನಿಮಿಷಗಳಷ್ಟು ತಡವಾದರೂ ಸಾಂಪ್ರದಾಯಿಕ ಪ್ರತಿವಿಷದ (ಆಂಟಿವೆನಮ್‌) ಸಾಮರ್ಥ್ಯ ಗಮನಾರ್ಹವಾಗಿ ಕಡಿಮೆ ಮಾಡುತ್ತದೆ ಎಂಬುದು ಅಧ್ಯಯನದಿಂದ ಸಾಬೀತಾಯಿತು.

ಇದರ ಜೊತೆಗೆ, “ಟಾಕ್ಸಿನ್-ಆಂಟಿಬಾಡಿ ಕಾಂಪ್ಲೆಕ್ಸ್‌’ನ ಸ್ಫಟಿಕ ರಚನೆ‌ ಬಗ್ಗೆ ತಿಳಿದುಕೊಳ್ಳಲು ತಂಡವು cryo-EM (ಕ್ರಿಯೋ-ಇಎಂ) ಅನ್ನು ಬಳಸಿತು. ಇದರಿಂದಾಗಿ, ಅವು ಅಂಟಿಕೊಳ್ಳುವ ವೈಖರಿಯು ಸ್ನಾಯುಗಳು ಹಾಗೂ ನರಕೋಶಗಳಲ್ಲಿ ಕಂಡುಬರುವ ಟಾಕ್ಸಿನ್- ರಿಸೆಪ್ಟಾರ್ ಗಳು ಅಂಟಿಕೊಳ್ಳುವ ಬಗೆಯನ್ನು ಯಥಾವತ್ ಹೋಲುತ್ತದೆ ಎಂಬುದು ಕಂಡುಬಂದಿತು. “ನಾವು ಅಭಿವೃದ್ಧಿಪಡಿಸಿರುವ ಪ್ರತಿಕಾಯವು ನಮ್ಮ ದೇಹದಲ್ಲಿನ ರಿಸೆಪ್ಟಾರ್ ಗಳ “ವಿಷಬಂಧಕ ನೆಲೆ”ಯನ್ನು ಪ್ರತ್ಯನುಕರಿಸುವಂತೆ ತೋರುತ್ತದೆ” ಎಂದು ಸುಣಗಾರ್ ಹೇಳುತ್ತಾರೆ. ನಮ್ಮ ಪ್ರತಿಕಾಯವು ತಡವಾಗಿ ನೀಡಿದ ಸಂದರ್ಭದಲ್ಲಿಯೂ ವಿಷವನ್ನು ತಟಸ್ಥಗೊಳಿಸುವುದರಿಂದ, ಇದು ರಿಸೆಪ್ಟಾರ್ ಗಳಿಗೆ ಅಂಟಿಕೊಂಡಿರುವ ವಿಷವನ್ನು ಕದಲಿಸಬಲ್ಲದು ಎಂಬುದನ್ನು ಇದು ಸೂಚಿಸುತ್ತದೆ.”

ಮೊದಲಿಗೆ, ಸಂಶೋಧಕರು, ಪ್ರತಿಕಾಯವನ್ನು ಸೃಜಿಸಲು ವಿಷವನ್ನು ಕುದುರೆಯಂತಹ ಪ್ರಾಣಿಗಳಿಗೆ ಚುಚ್ಚುವ ಬದಲಿಗೆ ಮನುಷ್ಯ ಶರೀರದಿಂದ ತೆಗೆಯಲಾದ “ಜೀವಕೋಶ ಸಾಲು”ಗಳನ್ನೇ ಬಳಸಿದರು. “ಪ್ರತಿಕಾಯವು ಸಂಪೂರ್ಣವಾಗಿ ಮನುಷ್ಯನ ಜೀವಕೋಶಗಳಿಂದ ಸೃಜನೆಯಾಗಿರುವುದರಿಂದ ಯಾವುದೇ ಅಲರ್ಜಿಯಂತಹ ಪ್ರತಿವರ್ತನೆ ಉಂಟಾಗುವ ಸಾಧ್ಯತೆ ಇರುವುದಿಲ್ಲ” ಎಂದೂ ಲ್ಯಾಕ್ಷ್ಮೆ ಪ್ರತಿಪಾದಿಸುತ್ತಾರೆ. “ಇದು ಒಂದೇ ಸಮಯದಲ್ಲಿ ಎರಡು ಸಮಸ್ಯೆಗಳನ್ನು ಪರಿಹರಿಸುತ್ತದೆ” ಎಂದು ಸುಣಗಾರ್ ಅಭಿಪ್ರಾಯಪಡುತ್ತಾರೆ. “ಮೊದಲನೆಯದಾಗಿ, ಇದು ಸಂಪೂರ್ಣವಾಗಿ ಮನುಷ್ಯ ಜನ್ಯ ಪ್ರತಿಕಾಯವಾಗಿರುವುದರಿಂದ ಸಾಂಪ್ರದಾಯಿಕ ಪ್ರತಿವಿಷ ಚಿಕಿತ್ಸೆ ನೀಡಲಾಗುವವರಲ್ಲಿ ಅಪರೂಪಕ್ಕೆ ಕಂಡುಬರುವ ಮಾರಣಾಂತಿಕ ಅನಾಫೈಲ್ಯಾಕ್ಸಿಸ್ ಸೇರಿದಂತೆ ಇನ್ನಿತರ ಅಡ್ಡ-ಪರಿಣಾಮಗಳನ್ನು ತಡೆಗಟ್ಟಬಹುದು. ಎರಡನೆಯದಾಗಿ, ಈ ಜೀವರಕ್ಷಕ ಪ್ರತಿವಿಷ ಉತ್ಪಾದಿಸಲು ಪ್ರಾಣಿಗಳಿಗೆ ಉಪದ್ರವ ನೀಡುವ ಪ್ರಮೇಯವೇ ಭವಿಷ್ಯದಲ್ಲಿ ಉದ್ಭವವಾಗದಿರಬಹುದು.

ಇತರ ವಿಧದ ಹಾವಿನ ವಿಷಗಳ ವಿರುದ್ಧ ಪ್ರತಿಕಾಯಗಳನ್ನು ಅಭಿವೃದ್ಧಿಪಡಿಸಲು ಇದೇ ವಿಧಾನವನ್ನು ಬಳಸಬಹುದು, ನಂತರ, ಇದನ್ನು ಏಕೈಕ ಪ್ರತಿವಿಷ (ಆಂಟಿವೆನಮ್) ಥೆರಪಿಯಾಗಿ ಸಂಯೋಜಿಸಬಲ್ಲ ಸಾಧ್ಯತೆ ಇರುತ್ತದೆ. ಇದನ್ನು ಚಿಕಿತ್ಸಕ ಪ್ರಯೋಗಗಳ ಹಂತಕ್ಕೆ ತೆಗೆದುಕೊಂಡು ಹೋಗುವ ಬಗ್ಗೆ ತಿಳಿಸುವ ಸುಣಗಾರ್, “ಈ ಹಂತದಲ್ಲಿ, ವೈದ್ಯರು ಚಿಕಿತ್ಸೆಗಾಗಿ ಈ ಏಕೈಕ ಪ್ರತಿಕಾಯವನ್ನು ಅವಲಂಬಿಸುವುದು ಸಾಧ್ಯವಿಲ್ಲ. ಇದು ಸದ್ಯಕ್ಕೆ ಕೆಲವು ಎಲಾಪಿಡಿ ಕುಟುಂಬಕ್ಕೆ ಸೇರಿದ ಹಾವುಗಳ ವಿಷಗಳ ವಿರುದ್ಧ ಮಾತ್ರ ಪರಿಣಾಮಕಾರಿಯಾಗಿರುವುದೇ ಇದಕ್ಕೆ ಕಾರಣ. ನಾವು ಇತರ ಹಾವುಗಳ ವಿಷದ ವಿರುದ್ಧ ಹೆಚ್ಚುವರಿ ಪ್ರತಿಕಾಯಗಳನ್ನು ಅನ್ವೇಷಿಸುವ ಪ್ರಕ್ರಿಯೆಯಲ್ಲಿದ್ದೇವೆ. ಭವಿಷ್ಯದಲ್ಲಿ ಸಾರ್ವತ್ರಿಕ ಪ್ರತಿವಿಷವೊಂದು ಅಂತಹ ಕೆಲವಾರು ಸಂಶ್ಲೇಷಿತ ಪ್ರತಿಕಾಯಗಳನ್ನು ಒಳಗೊಂಡದ್ದಾಗಿದ್ದು, ಪ್ರಪಂಚದ ವಿವಿಧ ಭಾಗಗಳ ಬಹುತೇಕ ಹಾವುಗಳ ವಿಷವನ್ನು ತಟಸ್ಥಗೊಳಿಸಬಲ್ಲದಾಗಿರುತ್ತದೆ ಎಂಬ ಆಶಾಭಾವನೆ ಈ ಅಧ್ಯಯನದಿಂದ ಮೂಡಿದೆ. ಆಗ ಪ್ರಪಂಚದೆಲ್ಲೆಡೆ ಬಳಸಬಹುದಾದ ಒಂದು ಸಾರ್ವತ್ರಿಕ ಉತ್ಪನ್ನವನ್ನು ಅಥವಾ ಕನಿಷ್ಠ ಭಾರತದಾದ್ಯಂತ ಕೆಲಸ ಮಾಡಬಲ್ಲ ಪ್ರತಿಕಾಯಗಳ ಮಿಶ್ರಣವನ್ನು ಮಾನವ ಚಿಕಿತ್ಸಕ ಪ್ರಯೋಗಗಳ ಹಂತಕ್ಕೆ ಕೊಂಡಯ್ಯಬಹುದು” ಎಂಬುದು ಅವರ ವಿವರಣೆ.

ಉಲ್ಲೇಖ:

ಖಲೇಕ್ ಐಎಸ್, ಸೆಂಜಿ ಲ್ಯಾಕ್ಷ್ಮೆ ಆರ್ ಆರ್, ನ್ಗುಯೆನ್ ವೈಟಿಕೆ, ಖೊಚಾರೆ ಎಸ್, ಪಟೇಲ್ ಆರ್ ಎನ್, ವೋಹಿ ಜೆ, ಸ್ಮಿತ್ ಜೆಎಂ, ಸಾಯೆ-ಫ್ರ್ಯಾನ್ಸಿಸ್ಕೊ ಕೆ, ಕಿಮ್ ವೈ, ಮಿಂಡ್ರೆಬೊ ಎಲ್.ಎಂ., ಟ್ರ್ಯಾನ್ ಕ್ಯು, ಕೆಡ್ಜಿಯರ್ ಎಂ, ಬೋರ್ ಇ, ಲಿಂಬೊ ಒ, ವರ್ಮಾ ಎಂ, ಸ್ಟ್ಯಾನ್ಫೀಲ್ಡ್ ಆರ್.ಎಲ್., ಮೆಂಝೀಜ್ ಎಸ್ ಕೆ, ಆಯ್ನ್ಸ್ ವರ್ಥ್ ಎಸ್, ಹ್ಯಾರಿಸನ್ ಆರ್.ಎ‌., ಬರ್ಟನ್ ಡಿ.ಆರ್., ಸೋಕ್ ಡಿ, ವಿಲ್ಸನ್ ಐಎ, ಕೇಸ್ ವೆಲ್ ಎನ್ ಆರ್, ಸುಣಗಾರ್ ಕೆ, ಜಾರ್ಡೇನ್ ಜೆಜಿ, Synthetic development of a broadly neutralizing antibody against snake venom long-chain a-neurotoxins, Science Translational Medicine (2024).

ಸಂಪರ್ಕ:

ಕಾರ್ತಿಕ್ ಸುಣಗಾರ್
ಸಹ ಪ್ರಾಧ್ಯಾಪಕರು
ಪರಿಸರ ವಿಜ್ಞಾನ ಕೇಂದ್ರ (ಸಿಇಎಸ್)
ಭಾರತೀಯ ವಿಜ್ಞಾನ ಸಂಸ್ಥೆ (ಐಐಎಸ್‌ಸಿ)
ಇಮೇಲ್: ksunagar@iisc.ac.in
ಫೋನ್: 080-2293-2896
ವೆಬ್‌ಸೈಟ್: https://www.venomicslab.com/

ಜೋಸೆಫ್ ಜಾರ್ಡೈನ್
ಸಹಾಯಕ ಪ್ರಾಧ್ಯಾಪಕರು
ಡಿಪಾರ್ಟ್ಮೆಂಟ್ ಆಫ್ ಇಮ್ಮುನಾಲಜಿ ಅಂಡ್ ಮೈಕ್ರೋ ಬಯಾಲಜಿ
ಸ್ಕ್ರಿಪ್ಸ್ ರೀಸರ್ಚ್
ಇಮೇಲ್: jardine@scripps.edu
ಫೋನ್: (858) 784-8135
ವೆಬ್‌ಸೈಟ್: https://www.scripps.edu/faculty/jardine/